DE APOSTROPHE

Quid est Apostrophe?

R. Est Schema, quo sermonem ad aliam personam, vel quasi personam convertimus, quam instituta oratio requirat. Ita Cicero pro Milone:

Vos vos appello, fortissimi viri, qui multum pro Republica sanguinem effudistis: vos in viri et civis invicti appello periculo, centuriones, vosque milites: vobis non modo inspectantibus, sed etiam armatis, et huic judicio præsidentibus, hæc tanta virtus ex hac urbe expelletur?

Apostrophe fit aliquando ad Superos, ad invocandum. Ita Bossuet:

Princesse, dont la destinée est si grande et si glorieuse, faut-il que vous naissiez en la puissance des ennemis de votre maison? O Éternel, veillez sur elle! Anges saints, rangez à l’entour vos escadrons invisibles, et faites la garde autour du berceau d’une princesse si grande et si délaissée.

(Or. fun. de la reine d’Angl.)

Non tantum ad personas fit Apostrophe, sed etiam ad res inanimas, sensuque carentes, aut aliquando ad belluas. Sic pastor ille apud Virgilium.

Ite, meæ, felix quondam pecus, ite, capellæ.

Et Cicero pro Milone:

Vos enim jam, albani tumuli atque luci, vos, inquam, imploro atque obtestor, vosque, Albanorum obrutæ aræ, sacro rum populi romani sociæ et æquales.

Quænam sunt Apostrophes regulæ?

R. Tres. 1. Raro est usurpanda: si enim crebrius adhibeatur, inepta erit, et frigidiuscula.

2. Sint ad eam parati animi; itaque in principio dicendi vix usurpatur.

3. Major poetis licentia conceditur, qui nonnunquam solius metri causa Apostrophen faciunt; ita Ovidius Trist. III, 8:

Nunc ego jactandas optarem sumere pennas,

Sive tuas, Perseu; Dædale, sive tuas.