DE LA CAUSE EFFICIENTE.

Engence de vipere, hé comment pourriez-vous bien parler vous qui estes méchans, puis que de l’abondance du cœur la bouche parle?

Nostre Seigneur découvre par là aux Juifs que dans la Moralle, la Nature de l’effet suit la Nature de la cause. Et qu’on ne doit pas attendre de bonnes paolles d’un cœur ulceré.

Qui nie la cause Efficiente, nie l’effet, niez l’Architecte, vous niez l’edifice, ostez l’innocence à un homme, vous luy ostez la source de ses bonnes actions, mais de la negation d’une cause il en naist une autre, de la perte de l’innocence qui est une cause efficiente du bien, il en naist la corruption qui est une Cause Efficiente du mal.

On divise la Cause Efficiente, en Seule & en Accompagnée.

La Seule c’est celle qui produit immediatement son effet.

Et l’Accompagnée c’est celle qui produit mediatement le sien.

Exemple de la Cause Efficiente seule.

Seigneur épargnez mon Peuple, il n’y a que moy qui ait peché; il n’y a que moy qui doive souffrir.

Autre exemple de la cause efficiente seule, ou pour mieux dire, absolue.

Si les choses retiennent du Principe dont elles partent, il n’y a point de doute que le Monde est parfait, puis qu’il a esté crée par la Perfection mesme.

Exemple de la cause Efficiente accompagnée.

Je ne nie pas, Messieurs, que l’ordre ne refide en la Personne des Generaux, & que sans la Prudence des Chefs, les meilleures trouppes ne soient souvent en estat d’estre défaites, mais quelque considerable que soit un General d’Armée, il faut confesser aussi, qu’il paye plus de la Teste que du Bras, & que s’il est juste qu’on luy donne tout l’honneur de la conduitte, il n’est pas raisonnable qu’on luy donne toute la gloire du succez. Le gain des batailles, Messieurs, ne dépend pas seulement des Membres, & des Chefs, il depend de plusieurs autres choses; Le Poste, La Poussiere & le Soleil, ont beaucoup de part à l’advantage des Combatans, & quoy que les choses qui sont incapables de vertu, soient indignes d’honneur, on ne laisse pas quelquesfois de les honorer: Les Anciens couronnoient les Vaisseaux où les Soldats avoient heureusement combatu. Les Chasteaux portoient sur leur teste les reconnoissances de leur service, & les Victorieux avoient en veneration les endroits, où ils avoient signalé leurs Armes.

Autre Exemple.

Ne vous fiez pas sur vostre genie, qui n’apprend rien ne sçait rien.

Qui plus estudie plus sçait.

Autre exemple.

Il n’a pû l’abattre estoit foible.

Il veut dire qu’il n’a pû estre victorieux parte qu’il n’estoit pas accompagné de vigueur.

Autre Exemple.

Ne doutez point qu’il n’ait pû faire le coup, il estoit bien armé.

Autre Exemple.

Ressouvenez-vous, Sire, que les flatteurs sont d’autant plus à fuïr, que le fol Amour que nous avous pour nous mesmes, contribuë à l’execution de leurs mauvais desseins.

Exemple de la cause Principale.

Vous ne devez pas vous affliger dit Joseph à ses Freres, de ce que vous m’avez vendu; Le Seigneur m’avoit envoyé devant, pour vous preparer les moyens de vivre.

Exemple de la cause instrumentaire.

Il n’est pas croyable, que vostre Inclination soit conquerante, puis que ceux qui haïssent les moyens, haïssent la fin, & que vous ne pouvez souffrir qu’on vous entretienne des necessitez de la guerre.

On divise la Cause Efficiente, en celle qui Procrée, & en celle qui Conserve.

La Cause qui Procrée, c’est celle qui donne la naissance à quelque chose; La Débauche par exemple, est la mere des maladies, Le Travail est la Source de la gloire.

La Cause qui Conserve, c’est celle qui fait subsister quelque chose; L’Histoire par exemple, Le Marbre & le Bronze, conservent la memoire des belles actions; La Corruption entretient la fiévre, Loysiveté nourrit la Concupiscence.

Exemple de la cause Efficiente Procreante.

Si le progrez d’une chose doit son estre en partie à son commencement, quelles marques de gratitude ne devez vous point à Komulus; Ne sçavez-vous pas qu’il est le Fondateur de vostre Republique, le Pere de vostre Patrie, & la Source de vos triomphes?

Autre exemple.

Si la Conjoncture des choses t’engage à faire la guerre, souviens-toy Gaston, que lu es le Fils de Henry le Grand, souviens-toy que tu dois la vie à la plus belle vie du monde.

Autre exemple.

Aymez vous l’honneur? aymez le travail, l’un engendre l’autre.

Exemple de la cause Efficiente conservante.

Si la Justice ne contribuë pas moins à la conservation des Republiques qu’à leur establissement, de quelle apprehension ne devez-vous point estre saisi; puis que le vice est monté à un si haut degré, que vos Princes mesme sont devenus les infracteurs de vos loix, & les corrupteurs de vos Magistrats.

Autre exemple.

Dieu est en l’Eglise comme son Pere.

Il est dans l’ame comme son Espoux.

Il est au juste comme son ayde.

Il est au reprouvé conme son boureau.

Et il est en chaque chose comme l’autheur de toutes choses. Qui manquera donc de reconnaissance, qui manquera donc de crainte.

On divise de plus la cause Efficiente, en cause par soy, & en cause par accident. Le feu produit par soy la chaleur; La nuict engendre par accident le larcin.

On comprend fous la cause par accident, la cause par ignorance, & la cause par contrainte; La curiosité d’Auguste fut cause par ignorance, que Jesvs-Christ n’aquit en Bethleem, & que la sainte Escriture fut accomplie. Et le cry de quelques Legions, fut cause par contrainte, que Brutus changea de resolution, & donna la bataille.

Quoy que dans la premiere division que j’ay faite de la premiere cause, j’aye parlé de la cause efficiente par nature, sous le nom de la cause efficiente seule, il me semble que j’en puis parler icy, puis que je ne l’ay considerée au commencement, que comme opposée à la cause aydante, & que je la puis considerer encores, comme opposée à la cause volontaire.

Exemple de la Cause Efficiente par Nature.

Comme de tous les mouvemens, Messieurs; il n’y en a point de plus excusables, que les plus naturels, j’ose me persuader, que la Cour fera reflexion sur celuy d’Hermogene, & qu’encores qu’elle soit establie pour proteger les Loix, elle ne se deffendra point de deffendre la nature.

On attaque Celimente, on l’assassine, Hermogene & quelques autres, arrivent sur ces entre-faites, le combat recommence & quoy que le party des agresseurs soit plus nombreux que celuy des interressez, Hermogene redouble si heureusement ses efforts, qu’il repousse le fer par le fer, & vange la mort par la mort. Voila, Messieurs, le recit de l’action, l’exposition du fait; voila ce qu’on sçavoit, & ce qu’on a déguisé.

Vous ne dites rien de nouveau Zelinde, lors que vous representez à la Cour, que les gens de la condition d’Ariste exigent de la nostre des retenuës extraordinaires, & ceux qui donnent cent fois plus à leur satisfaction qu’à leur devoir, sont capables de ruïner l’ordre de la vie civile, & d’allumer les Passions les plus violentes. J’avouë que celuy pour qui je parle, est un simple Officier, & que celuy contre qui je plaide est Mareschal de France; Qu’il y a bien de la difference entre la naissance de l’un, & la famille de l’autre, & qu’a l’exception de quelques rencontres, les inégaux doivent respecter l’éclat & la grandeur: mais outre que la sensibilité a divers degrez; qu’il y a des mouvemens imperieux & des transports invincibles: qui doute que le sang ne demande du sang; & que quand mesme Hermogene eust pû étouffer les ardeurs de sa colere, il n’eust fait une action estonnante, si à la veuë d’vn ennemy morguant & cruel, d’un corps ruisselant & terracé, il eust paru froid & craintif; & eust preferé un respect polytique à un ressentiment paternel?

Que la Cour considere donc, s’il luy plaist, qu’une extréme tendresse est un vif aiguillon qu’un fils ensanglanté est un objet pressant; qu’il y a des retenuës honteuses, & des crimes loüables. Qu’elle considere encore de grace, que ses Arrosts sont exemplaires, qu’elle doit la justice aux grands & aux petits, & que si par des raisons d’inégalité, elle sacrifioit les une aux autres, on pourroit reprocher au plus auguste Senat du monde, qu’il feroit plustost des exemples de faveur, que de droit, que sa severite seroit incomparablement plus dangereuse que salutaire, qu’elle ne retiendroit pas souvent le bras des inferieurs outragez, & qu’elle augmenteroit tousjours l’audace des Superieurs insolens.

Exemple de la cause Efficiente Volontaire.

Quoy que Theandre eust esté condamnable, s’il eust adjousté foy aux libelles, que la haine faisoit courir contre vous, la crainte d’estre un jour l'objet de vos justes persecutions, ne fut point la cause de son attachement; Il eust pû quitter vos enseignes; Il eust pu abandonner vos interests; Sa retraitte avoit des exemples; Sa faute eust receu des excuses; Vos fins estoient inconnuës, & vos actions sembloient criminelles. Il est vray que Fulgide avoit de l’aversion pour Theandre, & que Theandre n’eust pas eu dans son Armée les charges qui convenoient à son experience: mais comme celuy, dont j’honore la memoire, & de qui les enfans reclament par ma bouche, la protection de vostre grandeur, negligeoit la poursuitte des emplois éclatans, on peut dire qu’il estoit aussi peu touché d’ambition que de crainte, & que s’il prefera le rang qu’il avoit auprés de vostre Personne, à celuy qu’il eust eu auprés de Fulgide, ce fut par une volonté tres-libre, & par un mouvement tres-desinteresse.

Exemple de la cause Efficente par Accident.

Je ne doute point, que l’action, dont vostre Grandeur se plaint, n’ait alteré les Esprits de la Providence, & que cette émotion ne soit capable de produire de grands desordres: mais elle considerera, s’il luy plaist, que l’intention condamne ou justifie, que l’homme ne peche que quand il veut pecher, & que celuy pour qui je parle, est du nombre de ceux dont la conduitte dément la volonté.

Autre exemple.

Il ne sera pas tousjours temeraire, ses imprudences luy seront desavantageuses.

Autre exemple.

Sa maladie fera sa temperance, parce qu’elle fera son incommodité.

Il est excusable en son larcin, il a estè porté à cette extremité par une extreme misere.

Autre Exemple.

Vostre douleur est juste, ie l’avouë, mais quoy que vous ayez sujet de vous plaindre, vous n’avez pas lieu de me condamner, puis que les actions peureuses sont en quelque façon involontaires, que j’ay rompu par commandement ce que j’avois promis par inclination, que la crainte d’un assasinat est une passion effroyable & qu’il vaut mieux estre judicieux & infidelle, que d’estre ferme & imprudent.

Exemple de la cause efficiente par Ignorance.

J’ay tué un home, je ne le puis nier: mais outre que je l’ay tué, où l’on ne tuë ordinairement que des bestes, je puis dire hardiment, que je n’ay jamais veu debout, celuy que j'ay veu estendu.

 

EXEMPLE DES EFFETS.

de la cause efficiente.

On doit aimer moderément les liures & les biens, parce que les sciences enflent, & que les richesses amolissent.

Autre exemple.

Destournez vous des maisons de débauche, tel n’est point émeu aujourd’huy, qui est tenté le lendemain.

Autre exemple.

C’est bien avecque raison que la loy deffend aux Juges la reception des presens, ils aveuglent, ils corrompent:

Autre exemple.

Celuy qui a planté l’oreille sera-t’il sourd, celuy qui a donné les yeux sera-t’il aveugle.

Autre exemple.

Entre le rien & quelque chose, disent la pluspart des Philosophes, il y a un espace infiny, il y a donc un Autheur qui n’a point de fin.