Bary, 1660 : La rhetorique françoise

Définition publiée par RARE

René Bary, LA RHETORIQUFRANCOISE, OU L’ON TROUUE DE nouueaux Exemples sur les Passions & sur les Figures. OU L’ON TRAITTE A FONDS de la Matiere des Genres Oratoires. ET OU LE SENTIMENT DES PVristes est rapporté sur les vsages de nostre Langue. NOUUELLE EDITION. Augmentée de nouueaux exemples, & de nouuelles remarques; d’vn traité des Beueuëde l’esprit, & d’vn examen des parties de l’Oraison, PARIS, Pierre le Petit, 1660, première partie, "Des preuves sans artifice", p. 7-8.

Définition publiée par RARE, le 27 octobre 2017

DES CONTRACTS.

Si les Contracts nous seruent, il faut examiner leurs clauses, & exagerer leur force.

Et s’ils nous nuisent, il faut donner vn sens desaduantageux à l’intention de ceux qui les ont faits.

S’ils nous seruent, il faut dire que ce sont des loix particulieres, & que comme les loix doiuent estre inuiolables, les contracts doiuent auoir le mesme aduantage.

Et s’ils nous nuisent, il faut dire que la fourberie se glisse souuent dans les Conuentions; Que les contractans estoient differens en beaucoup de choses. Que l’vn faisoit profession de dol, & que l’autre se picquoit de simplicité.

S’ils nous seruent, il faut-dire que de les détruire c’est détruire le commerce, que c’est establir en vain des estudes publiques.

Et s’ils nous nuisent, il faut voir s’ils n’ont point esté faits contre les formes.

S’ils ne dérogent point à quelque acte qui les ait precedez ou qui les ait suiuis.

S’ils ne choquent point l’équité, les loix communes & naturelles.

S’ils ne sont point contraires à quelques nouueaux Arrests.

Il ne suffit pas d’interpreter à sa mode les actes & les pensées, & de rapporter toutes les deffenses que ie viens de déduire, il faut voir si les raisons qu’on allegue sont [p. 8] plausibles, & si elles le sont, il faut dire que le sens naturel plaide nostre cause, & que si c’est vne chose raisonnable de vouloir qu’on desobeïsse aux loix lors qu’elles sont injustes; c’est vne chose estrange de vouloir qu’on execute les Contracts lors qu’ils sont frauduleux.

Enfin si les Contracts qu’on produit contre nous, sont en quelque façon receuables, il faut representer que le Iuge tient la balance; Qu’il est estably pour examiner les choses, & qu’il doit moins considerer ce qui est iuste, que ce qui est plus iuste.